Dehom in Heidelsheim und Helmsheim: Mundart-Gedicht "Hoimed"

Die Helmsheimerin Alexandra Nohl hat dieses und weitere Gedichte des Söllinger Mundartautors Wolfgang Müller vertont und präsentiert sie zur Gitarre bei ihren Auftritten.

Hoimed

Vum Sechseleite morgens uffgweckt werre
Owets d’Hase nomol fiedere un d’Hehner eisperre
Bisz dunkel wird uff de Stroß rumrenne
Enanner gut kenne

Solang die Alte drauße sitze, uffbleiwe derfe
Mit em Opa seim Wetzstoi s’Daschemesser schärfe
Im Sommer sich traue im Haischopf zu penne
Dass ma Mores devor hett, zugewwe kenne

Immer domid rechle mieße, dass se oim de Frack versohle
Zammelege un e Gugg voll Brausestengelen hole
Mit zuene Auge de Gschmack rausfenne
D’Farwe rieche kenne

Mit Kreide ebbes uff’s Trottoir kritzle
Mit de Buwe hendle un d’Mädlen kitzle
Sich beim Eismann en Bolle in de Waffel genne
Alle (3!) Sorte kenne

Fangerles un Sucherles spiele
De Mädle unner s’Klaidle schiele
Jeden zwaite Samsdich zum Beichte renne
Awwer bloß net die so arg schlimme Sünde bekenne

Ab glei nooch de Osterferie barfießich laafe
Vom erschte Selwerverdiente e Pärle Griewewärscht kaafe
Net die waiche, sondern von sellene harte do henne
Sich durchbeiße kenne

Mit seine Freind im Stoibruch odder an de Baach rumtolle
Jo net zu spät hoimkomme solle
Net glei wege jedem Scheißdreckle flenne
Ruich a mol verliere kenne

Kirschde klaue un Niss runnerbengle
Sich beim drauße Liebhawwe sengle
Was oim beschäftigt beim Nome nenne
In Ruh iwwer alles schwätze kenne

Net weggugge, wenn um oim rum haikle Sache passiere
Net schlugge, dass allfort die Falsche profitiere
Vorgspiegelte Tatsache erscht emol drehe un wenne
Wenn’s sei muß, ab un zu d’Gosch verbrenne

In schwierige Situatione mit hailer Haut devokomme
Zurecht sage derfe: „I häb en annere Weg gnomme!“
Net ubedingt liewer oiner sei welle von „denne“
S’verwaarde kenne
S’verwaarde kenne

Wenn Sie mehr lesen möchten, klicken Sie einfach auf unsere Themenseite:
<a target="_blank" rel="nofollow" href="http://kraichgau.news/themen/dehoim.html">Dehom in Heidelsheim und Helmsheim </a>